Zum Hauptinhalt springen

la raquintadra

Cun grond anim e tschaffen raquentel jeu praulas e historias. Jeu raquentel buca mo fetg bugen, na, silmeins era ton plascher haiel jeu d'encurir praulas adattadas, da preparar e sedar giu intensivamein cun ellas tochen ch'ellas ein promtas da vegnir raquintadas. Jeu raquentel bugen tenor ina tematica, sco per exempel: catschadurs, mummas e feglias, unviern, giavischs, animals, erotica ed aschia vinavon.

Jeu raquentel per affons naven da 4 onns, per giuvenils ed era per carschi. Jeu raquentel en fetg divers loghens- fetg bugen ella natira en cumbinaziun cun ina spassegiada ni excursiun, endadens, seigi quei en stiva, ustria, aula, sala, scola, biblioteca, casa da seniors ni sin tribuna. Jeu raquentel per romontsch e per tudestg ni era en cumbinaziun e quei ton per in pign sco era per in pli grond auditori.
Mei entaup'ins adina a raquintond senza cudisch ni agid tecnic , pia a moda libra e cun agens plaids - deliberada dil text dil cudisch da praulas.
Ina praula da sis, siat lingias vegn tut tenor raquintada da mei en duas ni era en sis, siat minutas. Magari sundel minimalista, fetg essenziala e concentrada culs plaids. In'autra gada animescha ina praula mei dad esser generusa cun plaids, detagls, expressiuns. Inagada pretenda ina praula gestas minimalas, in'autra praula lai muentar mei da maniera pli extendida.
Mintga praula ei differenta, mintga praula ei unica, cumpeglia in scazi. Scadina praula che jeu raquentel schai fetg a cor a mi.